Kahlen心水好書推介—致戀愛經驗少嘅朋友 | 香港交友約會業總會 Speed Dating Federation

Kahlen心水好書推介—致戀愛經驗少嘅朋友 香港交友約會業總會 Hong Kong Speed Dating Federation - Speed Dating , 一對一約會, 單對單約會, 約會行業, 約會配對

 

2020-06-26 13:08:48

Kahlen心水好書推介—致戀愛經驗少嘅朋友

云云客人中,唔少係未曾拍拖,又或者只係讀書時拍過一次拖,所以唔太了解異性,亦因此犯咗唔少錯。除咗多同異性約會增加實戰經驗外,我亦鼓勵大家睇多啲書了解異性心態,今日介紹嘅兩本書,分別係《男人來自火星 女人來自金星》同”Act Like a Lady, Think Like a Man”。

《男人來自火星 女人來自金星》呢本書相信唔少人都聽過,但唔知大家有冇睇過呢?雖然佢已面世多年,但既然做得暢銷書,當然有佢嘅道理。我哋天生住喺一個性別嘅軀體中,自然永遠都唔能夠完全了解另一個性別,所以書中講嘅唔少事實,當年對我當頭棒喝,至今我仍然銘記於心。例如其中一點,講到男性週期性會想匿喺一個樹窿中,整頓好自己思緒後再出發。呢段時間,佢對伴侶可能相對冷淡,唔少女仔會誤以為對方變心,會騷擾佢獨處嘅時間,誰不知咁樣會令佢匿喺樹窿更耐。到咗今日,有時當我發現老公突然變到好靜,就會諗番呢點專注做自己嘢,到第二日佢就會變番平時咁。 

男士方面,大家都會從呢本書了解到女仔心態,十之八九男仔都係理性思維當度,好難理解我哋嘅情感思維。舉例女仔有時同你傾訴公司邊個同事唔好,好多男仔會即時跳去「解決問題」呢個mode,教佢點應對,但女仔講呢啲嘢原來只係想你氹下佢,你可能加把口鬧埋佢同事佢已經會開心番(笑)。書中仲有唔少兩性比較,戀愛初哥不妨睇多幾次。

”Act Like a Lady, Think Like a Man”就比較適合「覺得自己性格好好,但點解從來冇人珍惜我」嘅女仔。好多女仔(其實男女都係)因為欠缺經驗,當遇到個稍為可以發展嘅對象,就會提供200% 嘅關懷,咩都就哂對方,令自己一文不值!作者Steve Harvey有幾個女,都唔希望佢哋會變成其中一份子,所以本書不停提女性要有自己standard,先至會得到男性尊重。男性如果愛你,會好欣然將你介紹俾佢身邊人認識;如果愛你,唔會斤斤計較,對你會好大方。不過大家唔好以為咁樣你即刻要化身女漢子,變到好強勢爭取地位,記得呢本書都教大家要”Act Like a Lady”,話俾大家知男性詮釋愛嘅方式係完全唔同,佢哋大多數希望透過俾到更加好嘅生活你嚟表達愛意,所以相處時大家都要俾多啲鼓勵佢哋,滿足對方嘅英雄感。 

大家睇完呢兩本書不妨都share你哋嘅讀後感~

作者: Kahlen Li (HK Romance Dating Ltd Matching Consultant) www.hkrd.com.hk / goldenmatching.com

#The HK Federation of Matchmaking and Speed Dating Industry ​#dating #matching #單對單約會 #HKMDI #一對一約會 #交友約會配對 #交友APP #Love



上一篇Speed Dating單身資訊: 創業大軍更加要有強健體魄
下一篇Speed Dating單身資訊: 為愛人下心思 練得好廚藝