本地VS異國戀(上) | 香港交友約會業總會 Speed Dating Federation

本地VS異國戀(上) 香港交友約會業總會 Hong Kong Speed Dating Federation - Speed Dating , 一對一約會, 單對單約會, 約會行業, 約會配對

 

2020-07-18 13:01:43

本地VS異國戀(上)

唔少人知道我同外國人結婚後,都好有興趣知道會同香港人交往有咩分別,所以今次我會講講呢個話題。不過始終個別情況唔同,大家將以下事情當作參考吧~

一直以嚟,我都認為愛情無分國界(除咗某兩個國家男士我真係唔係咁鐘意),所以認識男仔時,只要對方係我喜歡嘅類型我都會樂意先認識。只係因為我本身喜歡比較高(我偏好178 cm或以上)同open-minded而又有獨立思想嘅男仔,最後同外國人會比較容易發展落去。

今次首先講講3個我認為嘅不同吧,首先我覺得普遍外國人係會比較少框框。舉個例子,好多香港男仔聽到女仔係律師就唔敢追,但我老公以往交往過嘅女仔五花八門,好多仲好有錢(我應該係最窮嘅一個)。喺佢嘅世界中,追求一個女仔唔會顧慮對方嘅背景。好多香港人覺得香港充滿「港女」,但喺我老公眼中,成件事完全唔同!佢成日都好奇怪點解香港有好多好好嘅女仔,事業成功又唔介意男仔收入,到咗30幾歲都仲會單身。(FYR我老公唔係白人來的)

香港人雖然都非常之靈活,但童年時嘅填鴨式教育無可否認影響到我地多年來根深蒂固嘅思考模式。不過公平啲咁講,嚟得香港嘅外國人通常有較多周遊列國經驗,歐美國家都有好多人成世未出過城一次,思想仲狹窄過我地。

其次,個人比較喜歡同佢地傾偈,因為會冇咁多忌諱。舉例說,我有樣興趣叫Human Design(係咩大家可以自己google),平時我都儘量唔主動同人講起,因為好多人聽完會覺得呢啲嘢係傻嘅。第一次我同老公講時我都驚佢接受唔到,因為佢仲要係位基督徒,點不知當日佢聽我講完兩句都覺得呢樣嘢幾有趣,繼續叫我講解多啲。不過都要重申,香港都有open-minded嘅男士的。

最後,講講好多人提及到嘅AA制吧,但好不幸地,我要同大家講番聲,個人經歷,除非佢對你冇興趣,否則即使外國人,好多都係願意俾埋女士嗰份的。我有個朋友嫁咗位歐洲男士,咁多年嚟都冇打過工,而且結咗婚4年,對方都仲成日買禮物氹佢開心(死喇咁講又好港女添)。不過香港男仔普遍都會暖男啲嘅,好多即使只係普通朋友,都會送你番屋企,外國人就比較少做呢樣嘢了。

 

作者: Kahlen Li (HK Romance Dating Ltd Matching Consultant) www.hkrd.com.hk / goldenmatching.com

#The HK Federation of Matchmaking and Speed Dating Industry ​#dating #matching #單對單約會 #HKMDI #一對一約會 #交友約會配對 #交友APP #Love



上一篇Speed Dating單身資訊: HKRD:哪類Speed Dating最受歡迎?
下一篇Speed Dating單身資訊: 本地VS異國戀(下)